تمام شوہر ہوشیار ہو جائیں،بیگم کو سرپرائیز دینے کی کوشش نے خاوند کو ہسپتال پہنچا دیا

نیویارک (نیوز ڈیسک) عام طور پر بیگمات کو شوہروں سے یہ شکایت رہتی ہے کہ وہ گھر کے کام کاج میں ان کا ہاتھ نہیں بٹاتے یا ان کیلئے ایسا کوئی خوشگوار کام نہیں کرتے جس سے انہیں خوشگوار حیرت ہو۔ امریکی ریاست نارتھ کیرولینا کے ایک فوجی نے اپنی بیگم کی یہ شکایت دور کرنے کے لئے ناشتہ بنا کر اسے سرپرائز دینے کا فیصلہ کیا لیکن افسوس یہ حرکت اسے کچھ زیادہ ہی مہنگی پڑ گئی۔

تفصیلات کے مطابق 28 سالہ ”ضیاءزیگول“ عموماً 8 بجے ملٹری بیس جانے کے لئے گھر سے نکل جاتا تھا۔ تاہم اس مرتبہ اس کے دل میں بیگم کی محبت جاگی اور آدھے راستے سے واپس آکر اپنی بیگم ”ٹفنی“ کیلئے ناشتہ بنانے لگا اس کی بیگم دوبارہ سو چکی تھی، تاہم اس دوران اس کی آنکھ کھل گئی اور وہ سمجھی کہ کوئی چور گھر میں داخل ہوچکا ہے۔ ضیاءاپنے کمرے کی جانب بڑھا تو بیگم نے اندر سے ہی فائر کردیا اور گولی دروازے میں سے ہوتی ہوئی اس کے سینے میں جالگی۔ ”ٹفنی“ نے دیکھا کہ اس نے کیا کیا ہے تو فوراً پولیس کو کال کی۔ بتایا گیا ہے کہ اب ضیاءکی حالت خطرے سے باہر ہے۔ خاتون کا کہنا ہے کہ حالیہ وقتوں میں محلے میں چوری چکاری کے واقعات کی وجہ سے اس نے سوچا کہ کوئی چور گھر میں گھس آیا ہے۔